ياما في الدنيا مظاليم

احنا رجعنا تاني للناس اللي استنونا كتيير واحنا اسفين ومش هنتأخر عليكوا كدة مرة تانية
بس احنا اتفقنا ان كل واحدة هتكتب مرة موضوع خاص بيها
واللي هتكلمكوا النهاردة انا (سولي) ؛
انا عارفة ان في كتير منكوا دخل على المدونة بتاعتنا لان مجرد الاسم شدهم بس لما حب يقرا الموضوع يمكن يحس ان الموضوع غير هادف ؛ والبعض ما دخلش على المدونة لانه حس من اسمها ان الموضوع غير هادف بالمرة ؛ وفي اللي حس انها لذيذة مجاملة لينا او تشجيع اننا لاول مرة بنكتب على المدونة ؛ وفي كتير منكوا ممكن يستغرب انا بقول كدة ليه وان اللي كتبوا مشكورين تعليقات عليها وانا بقدملهم التحية هيقولوا لا والله ديه عجبتنا وكانت لذيذة ؛ كل ده ممكن تعتبروه مقدمة لكلامي او موضوعي اللي احب ادخل فيه ؛ وهو ان في كتير مننا بيحكم على الشيء بشكل متسرع او بيستعجل في الحكم على الاشخاص؛ وفي بعض الناس شايفة ان شباب اليومين دول كلهم تافهين بس الناس اللي بتقول كدة ما سالتش ليه الشباب بتعمل كدة دون النظر ان الكبار اللي بيقولوا علينا كدة كان اهاليهم بيقولوا عليهم كدة برضه ؛ بس بجد الشباب في العصر ده مظلومين في حاجات كتيرة ؛ انا بتكلم كدة لاني بدافع عن شباب جيلي اللي بحس انهم محوطاهم كتير من المشاكل من ( مشاكل للسكن ؛ والبطالة ؛ واللي مش لاقين بطايق وبيطردوا من كلياتهم ؛ واللي تعبان في نظام التعليم الجميل في بلدنا اللي بيخلي الواحد يخرج منه معقد نفسيا” اصلا” بس مضطرين نتعلم احسن من الجهل ؛ وغير مشاكل كل واحد مع اسرته بسبب تفاوت الاجيال والاب والام مباقوش عارفين يفهموا ولادهم ).
وعلشان كدة الشباب حب انه ينسحب بنفسه ومعاه اصحابه يعيشوا حياتهم واخترعوا كلام جديد والفاظ مختلفة يتعملوا بيها مع بعض زى( فكك ؛ ونفض ؛………… الخ) و الشباب مجرد انهم يتقابلوا مع بعض بيتكلموا في مواضيع هادفة وغير هادفة وبيعملوا كل حاجة بيحبوها او يتكلموا في مشاكلهم وبيعملوا كل حاجة نفسهم فيها صح او غلط مباقتش فارقة ؛ وكل ده لان ناقصهم احساس واحد بس هو( الاحساااااااااااس بالأ مـــــــــــــــــــــــــان )؛ و في كتير هيقولي لو كل واحد رجع لدينه ونفذه صح هيحس بالأمان ؛ بس الظاهرة الجديدة اللي بقت موجودة بين الشباب وكل يوم بتزيد هي (اللادينين) وده بسبب انهم مش لاقيين حتى في دينهم الامان وده مش بسبب الدين نفسه ولكن وجود اراء كتييييييييييييييرة في التفسير او اراء رجال الدين وما حدش بقى عارف الصح من الغلط.؟؟؟؟؟؟؟؟!!!!!!!!!!!!!!!!!!!!!!!!!!!!!.